شاه داغيم ،
چال پاپاغيم ، 
ائل داياغيم ، 
شانلي سهنديم
باشي طوفانلي سهنديم
باشدا حيدر بابا تك قارلا قيروولا قاريشيب سان
سون ايپك تئللي بولودلارلا افقده ساريشيب سان
ساواشاركن باريشيب سان
گويدن الهام آلالي سرري سماواته دئيه رسن
هله آغ كوركي بورون ، يازدا ياشيل دون دا گئيه رسن
قورادان حالوا يئيه رسن

دوشلرونده صونالار سينه سي تك شوخ ممه لرده
نه شيرين چشمه لرين وار
اوياشيل تئللري ، يئل هورمه ده آينالي سحرده
عشوه لي ائشمه لرين وار
قوي ياغيش ياغسادا ياغسين
سئل اولوب آخسادا آخسين
يانلاروندا دره لر وار
قوي قلمقاشلارين اوچسون فره لرله ، هامي باخسين
دوشلرونده هئره لروار
او اتك لرده نه قيزلار ياناغي لاله لرين وار

گول چيچكدن بزه ننده ، نه گلين لركيمي نازين
يئل اسنده اوسولاردا نه درين راز نيازين
اوينايار گوللوقوتازين
تيتره يير ساز تئلي تك شاخه لرين چايدا چمنده
يئل او تئلرده گزه نده ، نه كوراوغلي چالي سازين
اورده گون خلوت ائديب گولده پري لرله چيمنده
قول قانادان اونا آغ حوله آچار غمزه لي قازين
قيش گئده ر ، قوي گله يازين
هله نوروز گلي وار ، قار چيچگين وار ، گله جكلر
سئل ، ياغيشدا يويونار كن ده گونش له گوله جكلر
اوزلرين تئز سيله جكلر

قيشدا كهليك هوسي له ، چوله قاچديقدا جوانلار
قاردا قاققيلدا ياراق نازلي قلمقاشلارين اولسون
ياز ، او دوشلرده ناهار منده سين آچديقدا چوبانلار
بوللي ، سودلي سورولر ، دادلي قاووتماشلارين اولسون

آد آليب سندن او شاعر كي ، سن اوندان آدآلارسان
اونا هر داد وئره سن يوز او مقابل داد آلارسان
تاريدان هر زاد آلارسان
آداش اولدوقدا ، سن اونلا ، داها آرتيق اوجالارسان
باش اوجالديقدا دماوند داغيندان باج آلارسان
شئر اليندن تاج آلارسان
اودا ، شعرين ، ادبين شاه داغيدير ، شانلي سهندي
اودا ، سيمرغ دن آلماقدادي فندي
شعر يازاندا قلميندن باخاسان در سپه لندي
سانكي اولدوزلار الندي
سوز دئينده گوروسن قاتدي گولي ، پسته ني ، قندي
ياشاسين شاعر افندي
اونه شاعر ، كي داغين وصفينه مصداق اوني گوردوم
من سنون تك اوجاليق مشقينه مشاق اوني گوردوم
عشقه ، عشق اهلينه مشتاق اوني گوردوم
اونه شاعر ، كي خيال مركبينه شووشيغاياندا
او نهنگ آت آياغين توزلي بولودلاردا قوياندا

لوله لنمكده دي يئر - گوي نئجه طومار سارياندا
گوره جكسن او زماندا
نه زمان وارسا ، مكان وارسا كسيب بيچدي بير آندا
گئچه جكلر ، گله جكلر نه بوياندا ، نه اوياندا
نه بيليم قالدي هاياندا؟

باخ نه حرمت وار اونون ئوزدئميشي توك پاپاغيندا
شعرينين تاجي اگيلميش باشي دورموش قاباغيندا 
باشينا ساوريلان اينجي ، چاريق اولموش آياغيندا
وحي دير شعري ، ملك لردي پيچيلدير قولاغيندا
شهدي وار بال دوداغيندا

اودا داغلار كيمي شانينده نه يازسام ياراشاندير
اودا ظالم قوپاران قارلا كولك له دوروشاندير
قودوزا ، ظالمه قارشي سينه گرميش ، ووروشاندير
قودوزون كوركنه ، ظالم بيره لر تك داراشاندير
آمما وجهينده فقير خلقي اگيلميش سوروشاندير
قارا ملتده هنر بولسا هنر له آراشاندير
قارالارلا قاريشاندير
ساريشاندير
گئجه حققين گوزودير ، طور تورتميش اوجاغيندا
اري ييب ياغ تك اوركلردي يانيرلار چيراغيندا
مي ، محبتدن ايچيب لاله بيتيبدير ياناغيندا
او بير اوغلان كي ، پري لر سو ايچرلر چاناغيندا
اينجي قاينار بولاغيندا
طبعي بير سوگلي بولبول كي ، اوخور گول بوداغيندا
ساري سونبول قوجاغيندا
سولار افسانه دي سويله ر اونون افسونلي باغيندا
سحرين چنلي چاغيندا

شاعرين ذوقي ، نه افسونلي ، نه افسانه لي باغلار
آي نه باغلاركي ((الف ليلي )) ده افسانه ده باغلار
اودياخيب ، داغلاري داغلار
گول گولرسه بولاغ آغلار

شاعرين عالمي ئولمز ، اونا عالمده زوال يوخ
آرزيلار اوردا خاطرليه امكاندي ، محال يوخ
باغ جنت كيمي اوردا بو حرام دير بوحلال يوخ
اومحبتده ملال يوخ
اوردا حال دير داها قال يوخ
گئجه لر اوردا گوموشدندي ، قيزيلدان نه گونوزلر
نه زمرد كيمي باغلاردي ، نه مرمر كيمي دوزلر
نه ساري تئللي اينكلر ، نه آلا گوزلو ئوكوزلر
آي نئجه آي كيمي اوزلر؟

گول آغاجلاري نه طاوس كيمي چترين آچيب الوان
حلله كروانيدي چوللر ، بزه نر سورسه بو كروان
دوه كرواني دا داغلار ، يوكي اطلس دي بو حيوان
صابرين شهرينه دوغرو ، قاطاري چكمه ده سروان
او خياليمداكي شيروان

اور دا قاردا ياغار ، آمما داها گوللر سولا بيلمز
بو طبيعت ،او طراوتده محال دير اولا بيلمز
عومور پيمانه سي اوردا دولا بيلمز

او افقلرده باخارسان نه ده نيزلر ، نه بوغازلار
نه پريلر كيمي قوشلار قونوب ، اوچماقدا ن قاز لار
گولده چيممكده نه قيزلار

باليغ اولدوز كيمي گوللرده ، ده نيز لرده پاريلدار
آبشار مرواري سين سئل كيمي توكدوكده خاريلدار
يئل كوشولدار ، سو شاريلدار(بولود قاراچورلو)