آرزي

ايسترم غملي و طوفانلي گئجه يولچولارا
بير فانوس تك يا دا قطب اولدوزو تك
                                                رهبر اولام.

ايسترم ياي گونو چؤللرده آخار
                                            بير سو اولوب،
دوم-دورو گؤز ياشي تك يولدا
                                      چوخور ايچره دولام.

ايسته‌مم نقش و نگاريم قالا،
                                            شعريم اوخونا
ايسترم بير سيزي، حسرت تك
                                            اوركلرده قالام.

اونودورسا مني ائل، چكمسه تاريخ آديمي
ايسترم آي تكي يورد اوسته
                                     گئجه شوق سالام.

حياتين كتابي

متني آيدينسا حياتين كتابي
احتياج يوخسا دا تفسيره اگر
يازاجاقلار من اؤلندن سونرا
اونا مبهم و اوزون حاشيه‌لر.

او حوادثله دولو بير اثري
اوخوماز اولدو منيم اقرانيم
طاق-نسياندا قاليب، توزلاندي
جلدي ييپرانميش اولان "ديوان"يم.

چوخ كتاب وار اونو ناققيشلا بزه‌ر
اينجه اللرله سمنبو جانان،
آما گؤز ياشلاريلا ايسلانميش
بو كتابين بوتون اوراقي اينان!

بير باهار آخشامي "ديباچه" يازيب
اونا مستوفي ديوان قضا
من اؤلوركن اونا بير "سون" قوياجاق
بير خزان يا كي غم‌آلوده شتا...

حبيب ساهير