تانري آديله

ايكي قاچيجي(دونده) قونشوم

گئچميش ايللرده ايكي قونشوم واريدي ، بيريسي وارلي بيريسي يوخسول. آنجاق توتوشدوراندا بير  اوخشانتي تاپماق اولاردي.. ؟!

آخي هر ايكيسي ده قاچيجيديلار  !!!

وارلي قونشوم سحردن آخشاما گزيليكده(پارك، بوستان) قاچيب يئكه قارنين اريتمك ايستردي، يوخسول ايسه سحردن ، آخشاما قاچماق ايله بير تيكه حالال چورك عائيلسي اوچون قازانماق ايسترميش.....

Resul İhsan Qoşaçaylı

2013.03.10

تانري آديله

"آهو گؤزلوم"

گؤرمميش سيماوي من ، دون گئجه ، اَن قُورخولو رؤياده گؤردوم     آهو گؤزلوم.....

جيرانيدن...، بير آلاگؤز ، بم بياض ،اَلده اُوخ...؟؟؟  آيني گؤردوم؟؟     آهو گؤزلوم؟؟

سورمه لي گؤزلرينده ، اُوخلانان بير اووچو گؤردوم ........         دويغولانديم.....

آخمامميش گؤز ياشلاريندا ، ماوي قانلي درياني گؤردوم      آهو گؤزلوم.....

سن اُوو ايدين ، اُووچو اُولموشدوم..... رؤياده من        بير اُووخسوز اُووچو!!!

اُوولادين آنجاق مني ، قانلي اوخلا ،رؤياده سن           آهو گؤزلوم.....

من سنه نِيلَميشديم؟ سالدين مني ائلدن ائله؟؟                    اي نازلي دلبر؟؟

ائللره يوخ!!!  آغلادان چؤللره ، اَن چُوراق كؤوشنلره....              آهو گؤزلوم.....

بيلمديم ، دويماديم رؤيامي من ،  سئومديم گؤرموشلري           اي اُووچو جيران

كؤنلومو سئودالي آنجاق.... قانلي بير رؤياده گؤردوم ....               آهو گؤزلوم.....

Rəsul İhsan Qoşaçaylı

2013.02.27

گوناهلاريميزي باغيشليان تانرينين آديله

يالانچي يوخسا  يالنيز چوبان؟

بيزيم چوبان يالانچي دئيلدي آنجاق يالنيزيميش. بونو كيمسيه دئمدي و كيمسه اونون يالنيزليغين دويمادي. كيمسه اونون داريخماسين آنلامادي.... كيمسه اونون داريخماسيندا توكدويو گوز ياشلارين گورمدي....

او يالانچي دئيلدي !! كند آداميدي كي اونو يالانچي ائلميشدي !! نئجه كي چوخلارين اوغرو ،  اؤلوتجو^* ، دين سيز و... ائلميشديلر...

آنادان اولدوقسا ، آناسي دوغوم آغريسينا دايانا بيلميب دونياسين ديشميشدي. او يئردنكي آتاسينين نفسي آناسينا باغليميش ، بو درد اونا آغير گليب ،ديغلاميشدي و بو يازيق بالاني بو نفرتلي كندين ايچينده تك قويموشدولار. آتاسيز ،آناسيز، يئددي ياشيناجان بو دايينين ، او عمينين  ائوينده بويوميشدي...  آخ... نه آجي دورانيميشلار بو اوشاقيليق عالمي بيزيم چوبانا... محبتسيز ، يولداشسيز ، يئري يوردسيز دوران.

محبت گورمميشدي كند آداميندان آنجاق تانري بير محبتلي و گئنيش اورك وئرميشدي اونا...  محبت ائلردي كي محبت گورسون،..... نه يازيق گورمزدي.... كيچيك دونياسينين ان بويوك آرزيسي بويدو، كند آدامينان دانيشا بيلسين.... دانيشديرمازيديلار....  آخي اوندا بير باشقاليق^* واريدي... او بير آتاسيز،آناسيز، وارسيز، يئر يوردسوز بير اوشاقيدي.

يئكلدي........ هر گون كندين داوارلارين اوتارماغا آپارايميش. داوارلاري ايله دانيشب ، اورئينده ايللر بويو قالميش اوزونتولري^* اونلارلا پايلاشارميش. داوارلار يالنيز اوت ييب و چوبانين اوزونه باخارميشلار..

بالا بالا اورگشدي نجور كند آدامي ايله دانيشا بيلسن!!!؟؟ يالان دانيشماق ايله گونده بير ايكي دفه اونلارلا دانيشا بيلردي. داوارلاري كؤوشنه آپاراندان سورا ، داريخان زامانلاردا  " آي قورد گلدي ، آي قورد گلدي " قيشقيريغي ايله كند آدامين كؤوشنه چكيب ، ميرت ائلرميش. كند آداميدا، ديشلرينين ديبيندن چيخان سؤزو ، چوبانا ديئرميشلر....

چوخ قيسسا آنجاق چوخ فرحلي زامانيميش كند آدامين يامانلارين ائشيدديئي چاغلار.....  آخي هر نه دئسلرده ، آزي اونو داريخمادان چيخارديرميشلار...

گونلر و آيلار بوجور گئچدي..... و هر كيمسه گوزلديئي چاغ يتيشدي ...... قوردلار گلديلر...... داهاسين  هر كس بيلير نه لر گلدي چوبانين باشينا....

اوگوندن بئري كيمسه اونو گورمييب.  تزه ليكجه ديرديلر بير يئكه بانكي وئريب ، نئچه نفري اولدوروب و گيزلين حالدا ياشير ؛ ياخشيسين تانري بيلر.....

بو دونيا بيزيم كنديميز و آراميزدا چوخلو يالان دانيشماميش يالانچيلار ، آدام اؤلدورمميش اؤلوتجولر ، كيمسه نين بير زادين اوغورلاماميش اوغرولار و تانري تانيان دينسيزلر آراميزدا...... تانري گوناهلاريميزي باغيشلاسين......

Rəsul İhsan Qoşaçaylı

2013.02.24

اؤلوتجو^*: قاتيل. آدام اؤلدورن. قانلي

باشقاليق^* : فرق

اوزونتو^* : غصه

گوزلليلكلر تانريسينين آديله

سن آتديدين ، من پيادا         ******    سن يامان أيدين ، من آوارا

سن گرچك ايدين ،  من يالان  *****  سن گئدن أيدين ، من قالان

آخي.... سن آتدييدين، من پيادا

سن نازلي ايدين ، من نازسيز     *****   سن دوزلويدون ، من دوزسوز

من آجي ايديم ، سن شيرين    ******  من ياوايديم ، سن يرين

آخي.... سن آتدييدين، من پيادا

حق گولوشوم ، باطيل اولدو     ******     باطيل سوزون ، حق اولدو

آغلئيرديم دردينده ، گولدون درديمه ** دايانديم...گئچ... اؤزگه اول قلبيمه

آخي.... سن آتديسان، من پيادا

سن وارلي ، من وارسيز        ******    سن آجيماز ، من هايسيز

من گون چيخان ، سن آخشامين دارچاغي* من سايا، سن قوچاقلارين قوچاغي

 سون نفسلردده ،  سن آتدي اول.......... من ...پيادا

Rəsul İhsan Qoşaçaylı

2013.2.21

تانري آديله

داوارلار

 بوندان نئچه ايل اول او زامان كي دونيا  تزه جه يارانميشدي  بير "ظاليم اينسان" ، "داوارلارين" باشين آلداديب ،  اونلارا صاحيب اولوب  و  بير قارانليق "آخيرين" ايچينده ساخلادي.

  بو "ظاليم اينسان"، اونلارين قارنين دويدوروب ، كوكلديب و هر آي بيرينين باشين كسيب اتين يئرميش. اونلارين هر گون سوتون  ساغيب ،ايچرميش. پول سوزليان زامانلاردادا  بيرين آپاريب  بازارا ساتيب، پولون خرجلرميش . بير ديره ني گوردوگي زامان دا ، اونلاري "قوردون"  گلميئيندن و اونلاري پارچا پارچا ائلمكده ن قورخوتارميش ...  اونلارا  هر زامان دئيه رميش كي: « "آخيرين"  ائشيگينده اوت علف تاپيلميركي! هر يئري قورولوق آليب آغزينا....»  و بو سوزلره  "داوارلار"  هر زامان اينانارميشلار .

يازيخ  "داوارلار" هئچ زامان "قوردون"  قورخوسوندان و البته آجليق و قورولوقون درديندن ، اؤزلرينه  گوونمه ديلر و تاريخ بويو "داوار" قالديلار....

يئديلر ، ايچديلر و نه يازيخ كي : ساغيلديلار ، ساتيلديلار، كسيلديلر و يئيلديلر....

ديره ني : اعتراض

واله شيري دن بير اؤيكو...

هاردايدين … ،

…، هاردايدين؟..

بونو آناسي دئييب، ايكي آدديم اوغلونا دوغرو ايرلندي. دستمال الينده، گؤزلري قيپ- قيرميزي قيزارميشدي…

اوغلان آچاري چيخارديب، قاپي‌يا سالاندا، ......

بي‌نهايت بو گؤيون آلتيندا
بيزه بير قبّه‌ي فيروزه ده يوخ!
يانار افلاكده مينلرجه چيراق،
بيزه بير شمع، بير آويزه ده يوخ!

بو قدر اولدوز آراسيندا بيزه
يئددي گؤيلرده بير اولدوز يوخوموش!
بؤلدولر قوشلاري عالمده مگر،
بيزه ده چاتدي او آغلار بايقوش؟!

قووالاركن مني هر گون محنت
قاپيمي دؤگمه‌ده‌دير هر گئجه غم.
هامي آزاده ائلين شاعري وار
من اسير ائللرين آه! شاعري‌يم.

تانري يوردموزو قوروسون.

رسول قوشاچايلي