
…،
هاردايدين؟..
بونو آناسي
دئييب، ايكي آدديم اوغلونا دوغرو ايرلندي. دستمال الينده، گؤزلري قيپ- قيرميزي
قيزارميشدي…
اوغلان آچاري
چيخارديب، قاپييا سالاندا، ائودهكيلر هاميسي ديك داشلانديلار. آتاسي اوز
دؤندريب، پنجرهيه دوغرو باخدي. هئچ يئريندن ده ترپنمهدي. آداقليسي سولغون حالدا
اللرين ماسايا داياق ائدركن، دوداقلاري تپيدي. بير سؤز دئمهيه دوداقلاري بير يئره
يوووشمادي. اوغلانين چاشكا- لوشكا يولداشي باشيني بولادي… تكجه آناسي دستمال
الينده باغرين آچيب، ايكي آدديم قاباغا ايرلندي. دئدي، هاردايدين؟.. سؤزونون
داليسيني گتيرنمهدي. قوللارين يانا آچيب، كؤكسونو اؤتوردو. هاردايدين اوغلوم؟!
اوغلان آرخا
چانتاسي چيينينده شاشميشدي. هويوق-هويوق ائودهكيلره باخيردي.
×
…، اورهييني
بوشالديب، نفهسيني دردي. آرخا چانتاسيني باشينين آلتينا قويوب، آرخاسي اوسته
اوزاندي. قول-قيچيني تير اوزالتدي. گؤزلريني دامچانين تاوانيندا كي تيرلره زيللهدي.
چوخ چكمهدي كيرپيكلري يومولوب، درين بير يوخويا بوروندو…
×
… ،اؤتن گئجه
ياتماميشدي. ايشدن قاييديب گلنده بير باش اوتاغينا گئديب، آرخاسي اوسته ياتاغيندا
اوزانميشدي. گؤزلريني تاوانينين دوم آغ بوياسينا زيللهميشدي. هميشه كي ساياق هئچ
ائودهكيلري ده يوخلاييب، سالاملاشماميشدي. آناسي اونو يورقون سانيب، دينديرمهميشدي.
تكجه شام چاغي اوتاغينين قاپيسيني دؤيوب، شاما سسلهميشدي. اوغلان ياتماميشدي. سسي
ائشيتميشدي. ندنسه دورماغا هئچ ماراغي اولماميشدي. اوتاغين قاپيسي بير داها
دؤيولدو.” اوغول سني گؤزلهييريك ها!..” آناسي ديللنميشدي… داها دؤزمهميشدي. ديك
دوروب، سيرفا باشيندا اؤتورموشدو. يئمك يئمهميشدي. آناسي اونا گؤز قويموشدو. يئمهيينن
قوردالانميشدي.” اوغول نييه قوردالانيسان؟ يئمهييني يئده.” ديللنميشدي. اوغلان
ها جان آتميشدي، گوجو بيللاه بير- ايكي قاشيق يئمهكدن يئميشدي. آناسي چوخ اوستون
وورماميشدي.” يقين يورقوندو.” دوشونرك، چوخ دا بركين ائلمهميشدي… سيرفا
ييغيشماميش دوروب، اؤز اوتاغينا كئچميشدي… دوز ايشيقلانادك اؤزو ايله وورنوخوب،
دارتيشميشدي. سيگاري سيگارين كؤتويونه آليشديرميشدي. تئلويزيونو آچيب، اونا
باخمادان اوتاقدا آدديملاييردي. اؤزو ايله دانيشاركن، آجي-آجي گولومسونوردو.
شاققاناه چكيب، گولوشوردو. آغ دوواردا يارانان كؤلگهسينين دؤررهسينه جيزيق چكيب،
ترپنمهدن اونو جيزيغين اورتاسيندا حبسه ساليردي. ياواش ياواش دووارا ياخينلاشيب،
قوللارين آچيردي. كؤلگهسيني قوجاقلاييب، باغيرينا باسيردي. ال- قولونو دووارا
سورتوشدورركن كؤلگهسينه ترپنمهيه ايمكان وئرميردي. دوداقلاريني دووارا
ياپيشديريب كؤلگهسيني سوروردو. سوروب سوموروب، ايچريسينه چكيردي. گئري چكيليب،
بير داها گؤزلريني دووارا زيللهييردي. كؤلگهسي آرتيق جانلانيردي. چاره سيزليكدن
ال- قولونو يانا ساليب، اوتاقدا آديملاييردي. قوللارين سينه سينه چارپازلاييب،
اؤزونه سيغينيب قيسيليردي… ائشييه باخماقدان اوشونوردو. اوشونوب چكينيردي. چكينسهده
دؤزه بيلمهدي. پنجرهيه ياخينلاشيب، پردهني يانا چكدي. اوردان خياوانا دالدي.
باييردا بير ايت ده اولاميردي. سكوتدان دوداقلاري تپيدي. ديزلري تيترهدي. تكجه
آرا- سيرا گاهدان گاها خياواندان اؤتوب كئچن ماشينلارين سسي اونو اؤزوندن آليب،
اؤزونه قايتاريرديلار… باشيني ديكلديب، بير آز اوزاقلارا باخدي. عينالينين
چيراقلاري ايشاريردي. خئيلي اونلارا گؤز تيكدي. اؤزونو ايشيقلاردان چوخ اوزاق
دويدو. بيردن بيره اوشوندو. حيس ائلهدي بوم- بوز بير شئي بالديرلاريندا دولاندي.
جانيني گزيب، فيرلانا- فيرلانا يوخاريلارا لاپ بئله اورهيينين باشينا قالخيب؛
اورداجا ياتاق سالدي. الين آتيب، اورهيينين باشيني اووخالادي. قيوريليب صندلين
اوسته ديزلريني قارنينا ييغدي. نه ايدي آخي. ايچين-ايچين ايچيني چكدي… بيلميردي…
… ، آرتيق
ايشيقلانميشدي. سحرين آلا-تورانليقي اوتاغادا چؤكموشدو. گئيينيب كئچيندي. آسقيدان
آسلانميش آرخا چانتاسيني گؤتوروب ايشه دوزلدي. ائشييه چيخاندا آناسي صوبح نامازينا
دوروب، يئني جه نيت ائلهمكده ايدي.” الله اكبر!..”
×
… ، افسر
شكيلي گؤرن همين بير آز دوروخدو. شوبههلندي. آنجاق چوخ چكمهدي كي گؤرموشم دئدي،
كئچن گئجه دوز قاپينيزين آغزيندا گؤردوم. البت كي افسر دوز دئييردي.گئجه، اوغلان
هاوا آلماغا خياوانا چيخاندا يولونو ساعات قاباغيندان سالميشدي. سيگار آليب،
فيكرلي- فيكرلي ائوه ساري قاييداندايدي كي او كئفليلرله راستلاشميشدي. منصور
چارراهين دؤنوب، مارالانا گلن خياوانين دؤنگهسينده او دؤرد نفر زير كئفلييه توش
گليب،… بيلهسيني قومارالاميشديلار.
، آ!.. تؤك
ائشييه!..
چوخ چكدي
اوغلان اؤزونه گليب، اؤزونو تاپسين. كئفليلرين بيري بير داها اونون سينه سينه
چالدي. آ… تؤك ائشييه. جيبينده نه وار تؤك ائشييه.
… ،
، آ!..آ…
، هئشزاد
يوخومدو.
كئفليلر
بونو ائشيدن همين شاققاناه چكيب گولوشدولر.
، اوهه!..
دئمهسن آلداتديم. آ… تؤك ائشييه. خ خ خ خوش ديلينن دئييرم هه!..
غريب
ايليشميشدي. گؤردوكلرينه اينانميردي. بيلميردي خيالدي، گئرچكدي. كيرپيكلريني
دؤنه-دؤنه چاليب، گؤزلريني يوموب آچدي. كار كسمهدي. بيردن سينه سينه دؤيولن
يوموروق اونو اؤزونه گتيردي. نئچه ياندان ال-قولوندان بوروب دووارا داياديلار. نه
قدهر دارتينسا دا بير ايش گؤره بيلمهدي.
، گئده!..
سننن دئييلوخ به. يا آدام ديلي باشا دوشمورسن، سن.
، سن كيمسن
آخي. ال چك ياخامدان بير گؤروم.
دانيشان
كئفلي او بيريسيلره، بوشلايين گؤراخ نه غلط دارتاجاخ. اوغلان پال- پالتاريني
دوزلديب، اونلاري سايمادان گئديردي كي آرخادان كؤينهييندن ياپيشديلار.
، باخ
گئده!.. دا مزهلنمه. هئيكليوه ايشهرم ها. خوشلوغونان نهيين وار وئر
گلسين. وآللاه ايشهييم گلير. باياخدان بير يئر آختاريرام پئل-پئل پئللييم.
يولداشلارينا باخيب، گولوشدولر…
غريبه
ايليشديخ ها، اوغلانين آغزيندان چيخان همين بيلهسيني ياخالاييب؛ قوللاريني
بوردولار. اوزو قويلو يئره اوزالتديلار. جيبلرينده نه وار ايدي چكيب، چيخارتديلار.
، آ…
اوغراش!.. دئديم كي هئيكليوه پئل-پئل پئللييهجم. شالوارين آشاغي سيييريب
اوغلانين باشينا پئلله-دي… شاققاناه ايچينده شالواريني يوخاري چكيب،
اوزاقلاشديلار… شاققاناهلاري بوم-بوش خياواندا سسلهنيردي… ،
دوز قاپيلارينين
آغزينا چاتميشدي كي داياندي. قاباغا ايرلنمهيه يئر يوخودو. ماشين قاباغيني
آلميشدي.گئجهنين بو چاغي خئير اولا. پليس ماشينين ايچيندن دئدي، هه!.. خئير اولا.
اوغلان بيلمهدي نه دئسين. اوتقونوب افسره باخدي. افسر اونو اتك –باش سوزدو. هه!..
هاردان بئله، هارا بئله.” دئيه اليني ترپتدي. ائوه گئديرديم دئيه، الينن ائولريني
گؤرستدي.” گئجهنين بو چاغي!.. افسر سؤزونون داليسيني گتيرمهييب، اوغلانين اوزونه
باخدي. ” چيخميشديم بير هاوام دييشيلسين.” ، ايشين كسبين نهدي؟..دئيه اوغلاني بير
داها دا سوزدو. ” گرافيستم!” ، … دئدين ائويز اورادي دا. ياخچي گئت ائويزه
گؤروم!..
اوغلان
قاپيني آچيب، ايچري كئچهنه جك اوردا دايانيب، داليسينجا باخدي…
×
… ، آخشام
چاغي ايدي يوخودان اوياندي. اوزانديغي يئرده گؤزلري آچيلدي. دؤنه-دؤنه كيرپيكلريني
چالدي. هندهوريني اتك- باش سوزدو. اللري قورويوب، بارماقلاري بير- بيرينه
ياپيشميشدي. اللري گؤينهييردي. اللريني قالديريب، باخدي. خئيلي باخدي. باخا-باخا
دوروب بارداش قوروب اوتوردو…
… ، صوبح
ائودن چيخاندا هارا گئدهجهييني اؤزو ده بيلميردي. كئييميش ايدي. بيليب-بيلمهدن
گليب، عيناليدان باش چيخارميشدي. چانتاسي چيينينده پيادا گليب چيخيميشدي داغا.
داغ اتهيينده آراييب، كسه يولونان چيخميشدي… خير داشلار آياغينين آلتيندا
زويوشوردولر. زويوشدوكجه اوغلان اوزو قويلو يئره گليردي. سايميردي. نه تهر داغا
ديرماشيردي، بيلميردي. قاباغا ايرلنديكجه آياقلاري ايله داشلاري گئري تؤكوردو.
داشلاري تپيكلهييب، درهيه هئللهديردي. ” آمان آللاه!.. نهدي آخي. نهدي؟..” نه
اولدوغونو بيلمهدن نفهسي تنگيييب، گؤزلري داريليردي. سارسينيب، وار گوجو ايله
داغا ديرماشيردي… نفهسيني سينه سينه قاپساييب، بير باشا قايالاري دولاشيردي.
ايمكلهيه-ايمكلهيه. خير- خومو اووجوندا سيخيردي. سيخيب داغ آشاغي هاوايا سپيردي.
اللري ياييم-ياييم اولموشدو. قان اللريندن سوزوردو. داشلاري گؤتوروب، اوزو آشاغي
درهيه ساري هئللهديردي. وار گوجو ايله گوجو چاتان داشلاري گؤتوروب درهيه هئللهديردي.
نفهسدن دوشموشدو. هوندور ديك داشلارين باشيندا اوتوروب، نفهسيني دردي. گؤزلري
داريلدي. قهر بوغازيني كسدي. ” آمان آللاه!.. نهدي آخي؟.. نهدي…” اؤزو ده
بيلميردي نه ايدي. بير جاوابا چاتمادان كووهردي. آرخاسي اوسته اوزاندي. اللرين
باشينين آلتيندا چارپازلادي. گؤم-گؤي گؤيو گؤزلري ايشلهديكجه سوزدو. توپپا-توپپا
آغ بولودلارين شكيللرينه باخا-باخا كؤكسونو اؤتوردو… آياغا دوراندا يومورو
داشلاردان بيريني وار گوجو ايله يئردن اوزوب، اوزو آشاغي درهيه دوغرو هئللهتدي…
آرخاسينجا دا داشين ديغيرلانماغينا باخدي…
كهليك
بولاغينداكي دامچايا چاتاندا، آرتيق گون اورتانين شاخلووو ايدي… اللري، ديزلري
تپيييردي. چانتاسيني الينده ساخلاماغا اينجاري يوخودو. چانتا زويوشوب اليندن يئره
دوشدو. اؤزو ده ائله اورداجا شئت دوشدو. باشيني چانتاسينين اوسته قويوب، درين
يوخويا جومدو…
×
… ، تلفونون
زنگي ائوي اؤزونه بورويوب، بوكدو. آرواد صوبح يئمهيي يئييردي كي تلفن زنگ چالدي.
گئجهدن اورهيي دؤيونتوده ايدي. دستهيي گؤتوروب گؤتورمهيينده شوبههلي ايدي.
چوخ چكمهدي گؤتوردو. اورهيينين دؤيونتوسو يئرسيز دئييلدي. زنگ آچان اوغلونون
ايش ييهسي ايدي. اوغلان ايشه گلمهييب. ايش ييهسي بير آز دا هاي- بودوروق سالدي
كي هر شئي دييب بير-بيرينه. ناماهلاما قاباقدان دا دئمهييب كي بيز ده چارهميزي
بيلهك!..
آرواد مين
بير فيكر خيال ايچينده، ايچي ايچين يئييردي. ناهارا چاغ هؤوشنه ايچينده بيلميردي
نئينهسين. قولاغي تلفوندا، گؤزو قاپيدايدي…. كيشي خسته ايدي. ايللر ايدي خسته
ايدي. ياتاقدا ايدي. گاهدان دوروب گوجو بيللاه ائوده گزيردي. آرواد نهيين نه
اولدوغونو اونا آغارتماسا دا، كيشي اونون صور- صوفتيندن، دويونلنميش
قاشلاريندان نسه بير زاد اولدوغونو دويموشدو. آرواددان نسه سوروشدو. آرواد دينمهدي.
كيشي اونون گؤزلرينه ائله باخدي كي آرواد اونون باخيشلارينا تابلاشانمادي.
ديللندي. آچيب سؤزون آچيغيني دئدي.”…، اوغلان ايشه گئتمهييب…” بيليردي كيشي نه
سوروشاجاق.”…، بللي دئييل هارا قويوب گئديب…”
كيشي
سارسيندي. آياق اوسته دايانماغا داياناتي اولمادي. گئديب ياتاغيندا اوزاندي.
اوزانيب، باشيني چكدي… ائوين دولانيشيغي اوغلانين اوزهرينه ايدي. بونو ياخشي
دويوردولار. ائو-ائشيكلرينين گؤزو اونون الينده ايدي. اوغلان عسگرليكدن سويونوب
گلندن چاليشيردي. بير آن دايانمادان گئجه-گوندوز چاليشيردي. باجيلارينين جئهيزيني
اؤزو قوشوب يولا سالميشدي. بونا دا چوخلو گووهنيردي… آرواد بونلارا دوشوننده
دولدو. نسه فيكريندن كئچدي. تلفن يئنه زنگ چالدي. حميد ايدي. اوغلانين ايشداشي.
ارصلاني سوراقلاشيردي. دئدي، سؤز وئرميشدي بويون منيم يئريمه ده ايشلهسين. من
بويون مرخصي ده ايديم… مجبور اولدوم بير ده قاييدام ايشه…
، بالام نه
دئييم آخي!..
، هئچ سيزه
بير سؤز زاد دئييب، ائلمهدي.
، يوخ بالام.
، سيز نيگران
قالمايين. اؤزوم سوراقلاشيب تاپارام بيلهسين… بير خبر اولسا دا سيزه دييهرم…
، !!!
، گؤرهسن
هارا گئديب دا… داريخمايين آخشام ايشدن چيخاندا گلرم…
، ساغ اول
بالام… قادا بالاوي آلارام.
، …
، قادان
اورييمه!..
، …
، …
آرواد لاپ
اوزولموشدو. صوبحدننن نئچه دؤنه كئچيب اوغلانين اوتاغيني دولاشميشدي. اوتاق قوپ-
قوخو ايدي. سيگار قوخوسو باش چاتلاديردي… كول قابي دولو ايدي كؤتويونن. تئلويزيون
آچيق قالميشدي… دووار جيزيق-جيزيق اولموشدو… آرواد غير عادي بير اولايين باش
وئردييينه دوشونوردو. آمما نه اولدوغونو هئچ ده آنلايانميردي. نه ائدهجهيينده
سله وئرن قالميشدي…
آخشاما ياخين
ايدي. داها دؤزنمهدي. اوغلانين آداقليسينا زنگ آچدي. قيز نه ايللاه ائلسه ده،
آرواد هئچ نه آغارتمادي. تكجه، بير باش گل بيزه!.. دئدي.
… ، اوغلانين
اوتاغيندايديلار. قيز يازي ماسانين آرخاسيندا دايانميشدي. ديل- دوداغي تپيييردي.
قاين آناسي اونو اتك-باش سوزدو… قاپ-قارا ساچلاري اورتادان تن آيريلميشدي.
آغ-آپباق يايليغي باشيندان زويوشوب، چيينينه دوشموشدو. آل دوداقلاري دريسينين
آغليغيندا پار- پار پاريلداييردي. قيز، چنهسينين آلتيندا گوجله سئچيلهجك
بوخاغينا سوواشان ترلي ساچلارينين اوجونو تئز-تئز بوينونون دالينا ييغيردي…
آروادين اورهيينده نسه كئچدي. ايستهدي بير سؤز دئسين. دئمهدي. اوتقوندو.
اوتقونوب، سؤزونو بوغازيندا قوروتدو!.. قيز بونو دويدو. تابلاشانمادي. آنا واللاه
منيم ده خبريم يوخدو. دئدي بو گئجه ده شامي بيزه گلجهيدي. آرواد يايليغينين
اوجونو الينده سيغاللاديقدا قيزين گؤزلرينه باخدي. هئچ بير سؤز-سوووموز دا
اولماميشدي. دئيه قيز ديللندي. آرواد كؤكسونو آليب، قيزيم من نه دئييرم كي آخي!..
آروادين سسي تيترهييردي. سسي، قيزي سارسيتدي. ائله بيل سسي قويونون ديبيندن
چيخيردي. بير آنليق اولسا دا باخيشلارين بير-بيريندن قاچيرتديلار. ايكيسي ده
كووريب دولسالار دا، اؤزلريني بير يئره توپلاييب قوجاقلاشديلار…
… ، آرتيق
قاش قاراليب، چيراقلار يانيردي كي پاسگاها گئتديلر…
×
… ، قاش
قارالميشدي. دامچانين ايچي قاپ-قارانليق ايدي. اوغلان باييرا چيخاندا هاوا
دوپ-دورو ايدي. آي شيغيييب، يئر-گؤيو ايشيقلانديرميشدي. اولدوزلار گؤيده الهنيردي.
اوغلان آشاغي يئنيب بولاق باشيندا اوتوردو. سو دوپ-دورو ايدي. سويا دوشن شكيلينه
باخدي. خئيلي باخدي. اوندا نسه بير يادليق دويدو. غريبه بير يادليق. اوندان چوخ
اوزاق ايدي. او قدهر كي هئچ بئينينده ده سيغيشميردي. اللرين سويا باسدي. شكيليني
پوزدو. ندنسه شكيليندن اوشونوب چكينيردي… ال-آياغيني يويوب، آياغا قالخدي. بولاق
آشاغي اكيلن تومورجوقلارا دالدي. اسگي ده آيين-شايينليق چاغلاري بورالارا چوخ
گلردي. يولداشلاريلا بيرگه، هفته باشي جمعه گونلرينين چوخلوسو بوردا كئچردي. آمما
ايندي نه ايدي. نه جمعه ايدي، نه ده يولداشلاردان خبر-اتر وار ايدي. نه ده
دلخوشلوغا چيخميشدي. پس نه ايدي. آلت-اوست اولموشدو. اؤزونه ده نه اولدوغو آيدين
دئييلدي. دارتينيردي. دارتينيردي بلكه بير جاوابا چاتسين. كلفجهنين اوجو اليندن
چيخميشدي. بوكولوب يوماغا دؤنموشدو. سارسيلدي. سورغونون باشيني بير يئره
باغلايانمادان دوروب هندهوري سوزدو. آراليغا تؤكولن قابلاردان گؤتوروب، بولاقدان
دولدوردو. تومورجوقلارين ديبلريني سويونان دولدوروب، سوواردي. بير به بير. هئچ بيريني
آددا-بودداق سالمادان هاميسينين ديبلريني دولدوردو… اينديكي كيمي ياديندايدي. هئچ
ده اونوتماميشدي بو آغاجلارين بيريني ده يولداشي حميد ايله بيرگه اكميشديلر. نه
قدر ده گولوشموشدولر. بوش-بوشونا ائله دانيشا-دانيشا گولوشوب شاققيلداميشديلار.
شاققاناهلاري قايالاري آغزينا آلميشدي… اينديكي كيمي ياديندايدي گولوشلري
قولاقلاريندا دينگيلدنيردي… اكديگي آغاجي لاپ ياخشي تانيييردي. بوداقلاري
اينجه-اينجه يام-ياشيل يارپاقلارلا بورونموشدو. يارپاقلارين ياشيلليغينا گؤزلري
ايشيقلاندي. يارپاقلاري سيغاللادي. سيغاللاييب، بارماقلاريني آغاجين بوداقلاريندا
گزديردي. ديز چؤكوب شئه تورپاغي قوخولادي. كؤكسونو آليب، ائله اورداجا آغاجين
بؤيرونده آرخاسي اوسته اوزاندي. اللرين باشينين آلتيندا چارپازلادي… اولدوزلار
گؤيده زيف-زيف ايشاريردي. اولدوزلاري ساييب، ساييني ايتيريردي. يئني دن باشلاييب،
ساييردي. ساييردي. ساييردي… ساييب حئسابي اليندن چيخيردي. گؤزلري دولوردو. اورهيي
سيخيليردي. ” آمان آللاهيم!.. نهدي آخي!.. منه نه اولور. باشيما نه گلير…” قهر
بوغازيني كسيب، ديلي توتولوردو. ايچريسي آلوولانيب يانيردي. بير جاوابا چاتمادان
سوسوردو. سوسوب گؤيون درينلييينده باخيشلاريني بوراخيردي. باخيشلاريني بوراخيب،
اؤزوندن آيريليردي…
… ، اسيم
اسيردي. سپ-سرين اسيم، اسيم-اسيم اسيردي. اسيب، ياناقلاريندان آخان داملالاري
اوزونه ياييردي. سرينلييي، جيزگيسي روحونو اوخشاييردي. جانين بدنيندن آييريب،
اوزاقلارا، لاپ بئله ال چاتماز يئرلره آپاريب، بوراخيردي…
×
… ،
هاردايدين؟..
بونو آناسي
دئييب، ايكي آدديم اوغلونا دوغرو ايرلندي. دستمال الينده، گؤزلري قيپ-قيرميزي
قيزارميشدي…
اوغلان آچاري
چيخارديب، قاپي يا سالاندا، ائودهكيلر هاميسي ديك داشلانديلار. آتاسي اوز
دؤندريب، پنجرهيه دوغرو باخدي. هئچ يئريندن ده ترپنمهدي. آداقليسي سولغون حالدا
اللرين ماسايا داياق ائدركن، دوداقلاري تپيدي. بير سؤز دئمه يه دوداقلاري بير يئره
يوووشمادي. اوغلانين چاشكا-لوشكا يولداشي باشيني بولادي… تكجه آناسي دستمال الينده
باغرين آچيب، ايكي آدديم قاباغا ايرلندي. دئدي، هاردايدين؟.. سؤزونون
داليسيني گتيرنمه دي. قوللارين يانا آچيب، كؤكسونو اؤتوردو. هاردايدين اوغلوم؟..
اوغلان آرخا
چانتاسي چيينينده شاشميشدي. هويوق-هويوق ائوده كي لره باخيردي….