جيرتدان ناغيلي

بيري واردي بيري يوخودي آللاهدان سورا هئچ كيم يوخودو. گونله‌رين بير گونو جيرتدان اوبادا اوشاقلاري ييغدي گئده‌لر اودون گتيرمه‌گه.

 اولار نئچه نفر اولوب گئدمه‌گه يول باشلاديلار گئده - گئده اودون ييغيب اوبالاردان اوزاقلاشديلار بير آن اؤزلرينه گلديلر كي هاوا قارانلوقلاشيب و قاييدماغا يولي تانيماديلار.

 او دئدي نه ائده ك، بو دئدي نه ائده ك، بيري دئدي ائنه ك درييه بيري دئدي چيخه‌ك تپي يه، او داغين باشيندان اوبارلارين ايشيغين اولسا گؤره ك.

جيرتدان دئدي منيم يولداشلاريم سيز منيم سؤزيمه قولاغ آسين و گلين بو قاباق كي داغي باشا چيخاك. ائله اوجور اولدو اوْلار جيرتدانين سؤزينه باخديلار اوْرا چيخيب بير ايشيلتي گؤرديلر و اوْنا ساري گئتديلر.

 يئتيشيب بير كؤهنه كوما گؤرديله‌ر، قاپيني ووردولار بير قاري قاپي آچدي، جيرتدان دئدي "قاري آنا بيز يول ايتيرميشيك بيزي بو گئجه‌ني قوناق ائده‌رسن؟"

قاري دئدي "به نييه ائله‌مه‌رم سيزه قوربان اولوم بويورون ايچري". اوشاقلار سئوينجه‌ك اورا دولدولار قاري اولارا سو و چؤره‌ك وئريب اولاردان اولاجاقي سوروشوب و ايشي بيله‌نده‌ن سونرا دئدي سيز راحات بوردا ياتين من سحر تئزده‌ن سيزه يولو گؤرسه‌دره‌م.

 سورا قاري اله بير خارت داش آليب چؤله چيخدي جيرتدان سزيرگه‌ييب اودا چؤله چيخدي آمما گيزليننه‌ن كي قاري گؤرمه‌سين آمما نه گؤردو، واي.

قاري بير پيسليكلي دوْودور و اوْ اوْتوروب ديشله‌رين ايتيلدير. جيرتدان اونو بيلجه‌ك دئدي واي عجب ايشه قالديك ايندي گره‌ك چاره ائده‌م و اوشاقلاري بوردان قورتارام.

جيرتدان ايچري گيريب دئدي اوشاقلار ياتين آمما نئجه چاغيرديم دورارسوز.

قاري گليب اوشاقالارا يئر ساليب دئدي: منيم بالالاريم گئجه‌ز خئيره قالسين  خوش ياتاسوز، جيرتداندا بير يئرده اوزانيب  اؤزون يوخويا ووردو، بير آز كئچه‌ننه‌ن سوْرا قاري گليب سسله‌دي:

كيم ياتيبدي كيم اوياق؟

ائشتدي:

هاممي ياتيب جيرتدان اوياق

قاري: جيرتدان ننه قوربان نييه اوياق‌سان

جيرتدان: گونده بو زامان آنام منه خاشيل پيشيره‌ردي

قاري دوروب اوجاغي يانديريب اون، شكر و سو گتيريب جيرتدانا خاشيل پيشيردي، جيرتدانا وئردي دئدي يئ تئز يات سحر گره‌ك تئزده‌ن گئده‌سن

جيرتدان يئييب گينه يئره گيردي بير آزدان سورا گينه قاري سسله دي:

كيم ياتيب كيم اوياق؟

گينه ائشتدي:

هاممي ياتيب جيرتدان اوياق

جيرتدان ننه قوربان گينه نييه ياتماييب‌سان؟

گونده بو زامان آنام منه قويماق پيشيره‌ردي.

گينه قاري اوجاغي آليشديريب باشلادي قويماق قويا، قويماغي حاضيرلاييب گتدي قويدو جيرتدانين يانينا جيرتدان يئييب يئرينه گيردي.

گينه قاري گلدي:

كيم ياتيب كيم اوياق

ائشيتدي:

 هاممي ياتيب جيرتدان اوياق

جيرتدان به ننه قوربان بو دؤنه نييه ياتماييب‌سان؟

گونده بو زامان آنام منه چايدان كمه ده سو گتيره‌ردي

قاري كمه ني گؤتوروب يومولدو چايا و اؤز ـ اؤزونه دئدي بو سفر  نئجه قاييدميشام اونلاري يييه‌جه‌م ائله هامي دان قاباغدا جيرتداني ييه‌جه‌م.

قاري ائوده‌ن چيخان همه‌ن جيرتدان اوشاقلاري اوياديب دئدي تئز اولون گئدين آغشام گلدييميز داغين باشيندا مني گودون اوشاقلار نه اولوب سوروشدولار جيرتدان قاري نين اولارا قوردوغو "قورغو"-نو دئدي.

اوشاقلار سوروشدولار بس اؤزون نييه گلميسه‌ن دئدي منيم بير خيرده ايشيم وار سيز گئدين من الان گللـه‌م  اوشاقلار گئده‌ن همه‌ن جيرتدان اوْلارين ياستيغلارين يورغانلاري آلتدا اوزاديب.

آمما قاري چايدا نه قدري چاليشدي ائده‌بيلمه‌دي كمه سو دولدورسون هي ووردو چايا ايسته‌دي گؤتوره كمين ييرتيغله‌رينده‌ن سو آخيب گئتدي، آخيردا هيرسله‌نيب اؤز كثافتينه‌ن كمي سوواييب اونا سو دولدورودو يولا دوشدو، گليب چاتيب سسله‌دي:

«جيرتدان بالام گل بودا سو»

 هر نه سسله‌دي جاواپ ائشدمه‌دي تئز يوراغاني يان ائديب گؤردو هاميسي گئديبلر،  بو هايدا قارينين بيزوْوونون سسي اوجالدي قاري بيلدي كي اوشاقلار گئديبلر بيزووو آپارماغا اونا گؤره ياواش و گيزلينجه گئديب گؤردو جيرتدان بيزووون چاتي سين توتوب چكير داغا ساري قاري خافدان آتيليب جيرتداني توتودو ،«واي كؤپه‌ك اوغلو ايندي سن منيم بيزووومو آپاراسان  سني آپاريب پيشيريب يييه‌جم» قاري دئدي.

 قاري جيرتداني گتيريب بير توربايا سالدي و اونو قازانا باسيب آلتينا اود وئردي ،اؤزوده چايدان سو گتيريب قازانا تؤكمه‌گه گئتدي.

جيرتدانين جيبينده بير كولا تييه واريدي اوْننان بير جور توْربانين آغزين كسيب چؤله چيخدي و تئز قاري‌نين بيزووون گتيريب قازانا سالدي.

جيرتدان قاري نين ائوينده‌ن بير الينه اون آليب بير الينه دوز چيخيب دوردو دامين اوستونده باجانين قيراغيندا قاري هيزميله قاييديب سووو قازانا انده‌ردي و اوْجاغي قالادي بيزوْوا ايستي ده‌يه‌نده اوجادان بؤيوردو  قاري دئدي:

 «هله هاروندي يازيق جيرتدان سني پيشيريب يييه‌جم  نه قدر هونكوروسه‌ن هونكور»

 بيرده‌ن جيرتدان باجادان سسله‌دي آي قارانا او من دگيلم او اؤز بيزوووندور من بوردايام قاري بئله ائشيتجه‌ك قيشخيريب جيرتدانا ساري قيسنه‌دي  جيرتداندا دامدان دوشوب قاچماغا باشلادي  او قاچدي بو قاچدي اولار قاچماغلاريندا بيزوو اوددا پيشيب ياندي.

بير تو(يك مدت)   قاچاندان سورا جيرتدان بير دالي باخيب گؤردو آز قاليب قاري اونو توتا تئز دوزو دالينا آتدي يئر بوتون تيرتيكانليق و قوزاليق اولدو قارينين ال آياغي چاپيليب و يارالاندي جيرتداندا قاچدي داغ باشينا ساري

بير آز دان سورا جيرتدان گينه بير دالي باخيب گؤردو قاري گلير نه گلير اينديدي‌كي اونا يئته‌ر جيرتدان قاچدي قاري قاچدي جيرتدان داغين باشينا چاتدي تئز اونو سپدي، داغين بؤيرو بير يئكه آياق دورمييان سيلديريم اولدو  قاري هئلله نيب گئتدي دوشدو درييه و قاييدانمادي.

جيرتدان يولداشلارين تاپيب اولارنان ساغليقدا اوبايا قاييتدي.

                                            سيزده ساغ قالاسيز